Lletras ribagorzanas pa cancions del mundo

 

Hoy meten aquí las lletras que Chuan Carlos va escribí pa estrenálas en la entrega de premios del Condau de Ribagorza. Ahora que ya to se sabe, ben que se i pueden expllicá. La primera é Ves-ye y di, reescribida de la canción May it be, que sona en la película The Fellowship of the Ring. La segunda é una nana que de conocese per The seal lullaby (de Eric Whitacre) Chuan Carlos la ha pasau a Ninín. Y la última é una canción tradicional de Trinidad que de titulase Ophelia letter blow’way pasa a dise Canta. Los arreglos musicals los ha feito nuestra directora, Mónica Lorenzo.

Gracias a los dos per la gran faena que han feito, que ha permitiu la nuestra contribución a un maitino tan emotivo como va sé ixe. Aprovechán pa felicitá a toz los que van participá en el concurso, que lo fan posible, y a los ganadós.

Y felicitá tamé con to nuestro cariño y respeto a Mónica Lorenzo y Antonio J. Gil que mos van ofrecé un concierto inolvidable.

 

VESYE Y DI

Vesye y di que ya no cal

la lluz del sol.

Vesye y di que encara tiens

la fe con tú.

Regulá que al cielo ñ’hay

un troz del tuyo corazón.

 

May rendise, may caé.

Las boiras bel día escamparán.

Si no fas peus me tiens a yo.

Si quies pllorá lo farén los dos.

 

Vesye y di que bella vez

ñ’habrá illusión.

Vesye y di que al tuyo lau

me despertaré.

Las estrellas fan brillá

per la noche al corazón.

 

 

NINÍN

No pllores ninín, te tiengo en brazos.

El sol ya badalla cansau de chugá.

 

Escura é la noche, la lluna desperta.

Si cerras ixes ojez la verás.

 

Si relampadea u veis a la rabosa

faré un ñedo d’estrellas azuls.

 

Si veis que soneas y no puez dormí

un beso ben gran te daré, mi amor.

 

Descansa ninín. Ara tiens que dormí.

 

 

CANTA

Si charras como pensas,

si’scribes como charras.

Si no tiens pas vergüenza,

ni miaja, res ni brenca.

Si’stás ben orgulloso

teninye esta llengua.

Si no quies que se pierda,

ni miaja, res ni brenca.

Canta

Si puyas u si baixas,

si tornas u si marchas,

si no quies que se pierda

el cantas con nusatras.

Anuncios

23 de abril en la Sala Trinitarios

Mos fa una ilusión tremenda participá per primera vez en la entrega de premios del Concurso Condau de Ribagorza. ¡Y en la Sala de los Trinitarios d’Estadilla! Precioso llugá… Pero encara más si cabe mos ilusiona estrená tres obras que Chuan Carlos de Fonz ha teniu l’amabilidá de reescribí al ribagorzano; ya verez, tos gustarán seguro (ixo esperán). Y dispués otra actuación que no tos podez perdé, la de Antonio J. Gil y Mónica Lorenzo fen tamé un homenache musical y poético a la nuestra llengua. La cosa pinta magnífica… ¡que ganas tenín de está-ie y de veyétos!