¡Cuasi un año sin contá cosa! Y sí, tenín novedaz que expllicá.
La primera é que este curso, amás de los ensayos habituals una vez per semana, hem incorporau cllases de técnica vocal. Mónica Lorenzo ha siu l’encargada de fe-las. Con ella hem traballau la cohesión de las distintas cuerdas, mos ha enseñau truquez vocals pa defendé los temas del repertorio, hem feito ejercicios de concentración, respiración, escucha colectiva, etc. Chicoz aprendizajes (y divertius) que sin embargo calan en el resultau final; Antonio está contento con los avances que s’han conseguiu, las voces cada vez sonan más «acordadas», si mos permitiz la expresión. Y más contentas, si cabe, que ixo é prou importante.
Tamé hem recibiu nocions elementals de llenguaje musical. D’ixo s’ha encargau el propio Antonio. Sobre tó hem iu traballán el tiempo y el ritmo.
En lo que fa a actuacions, en Estadilla hem feito las habituals: concierto de Navidá, misa el día de la Carrodilla en el santuario, misa el día de nuestra patrona en la iglesia parroquial. A Binaced van torná pa sus fiestas de san Marcos, cantán la misa y ofrecén dispués un concierto curté. Aprovechán aquí pa agradecé los suyos aplausos, escucha, el suyo entusiasmo… Mos sentín muy felices cantán allí.
Este mes de mayo hem participau en Binéfar en un encuentro coral chunto a la Coral de voces blancas Versa, la anfitriona, y los nuestros amigos de Sariñena. Un gusto tamé; la iglesia abarrotada de chen, los aplausos abundantes… van pasá una tarde magnífica cantán y sentín cantá. Y un placer conocé a las entregadísimas cantoras de Binéfar. Y é lo que siempre dim, esto de cantá ¡qué ben que senta al espíritu y al cuerpo!
Va una foto que hem baixau del facebook de la coral Versa. Corresponde a los cantos finals, las tres corals chuntas. ¡Hasta pronto amigos!
Cantos en Binéfar: coral Versa, coral de Sariñena y la nuestra coral.
Coral Statella 